LAOAG CITY – Inserra manen ti Iran ti Strait of Hormuz gapu iti agtultuloy a “blockade” wenno panangserra ti Estados Unidos kadagiti pantalan da.
Inawagan ti Iran a “piracy” iti baybay ti ar-aramiden ti Estados Unidos.
Inaramid ti Iran ti nangpaserra manen ti Strait of Hormuz maysa laeng nga aldaw kalpasan a linukatan na kalpasan ti deklarasyon ti 10 nga aldaw a ceasefire iti nagbaetan ti Lebanon ken Israel.
Inreport dagiti maritime security sources nga adda dagiti putok ti paltog a naggapo kadagiti gunboat ti Iran kontra iti maysa a tanker.
Naamoan nga ado a barko ti nagsubli gapu iti nakaro a tensyon.
Iti Hormuz Strait a dumaldalan ti agarop 20% ti langis iti intero a lubong isut gapuna a ti panagserra na ket nangitunda ti panagamak iti panagngato ti presyo ti langis.
