LAOAG CITY – Inanunsio manen ti Iran ti panagserra ti Strait of Hormuz kas sungbat kadagiti panangatake ti Israel iti Lebanon a nangitunda ti baro a tension iti Middle East idinto nga agtultuloy ti diplomatiko a panagsarita para iti ceasefire.
Basar iti Iranian central military command, ti addang ket naaramid gapu iti maipagarup nga agtultuloy a panaglabsing ti Israel iti napagtulagan a ceasefire iti Lebanon.
Nagballaag met ti Revolutionary Guards a saan a palubosan a makastrek iti nasao a pagnaan dagiti barko ken kunana a maikabil iti risgo ti seguridad dagitoy no aglabsingda.
Ti Strait of Hormuz ket maysa kadagiti kapapatgan a pagang-angkatan ti langis ken gas iti lubong isu nga aniaman a panagserra iti daytoy ket manamnama nga adda ti dakkel nga epektona iti world supply ti enerhia.
Iti baet daytoy, agtultuloy ti plano maipapan iti kinakappia iti Switzerland iti nagbaetan ti Iran ken Estados Unidos kabayatan nga agtaltalinaed a nangato ti tension gapu iti agtultuloy a rinnupak iti Lebanon iti nagbaetan ti Israel ken Hezbollah.
