LAOAG CITY – Nagballaag ti Iranian Armed Forces nga aniaman a panangatake iti oil ken energy infrastructure-da ket agibalesda babaen ti panagbomba kadagiti energy facilities dagiti kompania a kaalyado ti Amerika iti rehion.
Basar iti Al-Anbiya Central Headquarters ti militar, insigida a dadaelenda dagiti maseknan a kompania.
Nupay kasta, kuna ti maysa nga Iranian official a normal ti operasion iti Kharg Island kalpasan ti panangatake nga inwayat ti Estados Unidos.
Inbatad ni Ehsan Jahaniyan, Deputy Governor ti Bushehr province, saan a naapektaran ti panagbiag dagiti residente iti lugar ken awan ti natay a military personnel, company employees ken sumagmamano a residente iti nasao nga isla.
Ti Kharg, maysa a bassit a coral island nga adda ti kaadayo a 33 a kilometro manipud iti kabaybayan ti Iran ken maysa kadagiti kangrunaan a terminal a pagdaldalyasatan ti agarup amin nga oil exports ti pagilian.
Naammoan a ti isla ket addaan ti storage tanks ken pabahay para iti rinibribu a mangmagged nga ar-aramiden daytoy nga asset para iti ekonomia ti Iran.
Kabayatanna, no mapukawan ti kontrol iti Kharg, marigatan ti Iran ken maapektaran ti operasion ti militar nga agbalin a leverage para iti Amerika.
