LAOAG CITY – Nangilukat ti posibilidad ti Iran a palubusan na dagiti barko nga adda ti pakainaigan ti Japan a makadalyasat iti Strait of Hormuz.
Ti desisyon ket makitkita a napateg para iti Japan gapu ta nasurok a 90% ti suplay ti langis ket dumaldalan iti nasao a ruta.
Iti baet ti kumarkaro a tension iti Middle East, nagtalinaed a sensitibo ti sitwasyon para kadagiti dumaldalyasat iti nasao a ruta.
Nupay kasta, nakikoordinaren ti Tokyo iti Tehran tapno masigurado ti kinatalged dagiti barko da ken mapagtalinaed ti agtultuloy a suplay ti enerhiya.
Basar kadagiti opisyal, naannad ti Japan iti diplomasya da tapno saan a maprobokar ti sabali pagilian nga addaan ti interest iti seguridad ti strait.
Daytoy a posibilidad ket makitkita a makatulong tapno maalay-ayan ti pressure iti merkado ti langis, aglalo ket iti laeng kallabes ket napilitan ti Japan a nangiparuk-at ti paset ti reserba da a langis.
Iti pakabuklan, ti addang ti Iran ket mangipaay ti namnama iti Japan a mapagtalinaed ti energy security iti baet ti agtultuloy a krisis iti rehiyon.
