LAOAG CITY – Kinumpirmaran ni Iran Supreme Leader Ayatollah Ali Khamenei a rinibribu a tattao ti natay iti napalabas a protesta idiay Iran ken inladawanna ti sumagmamano a pannakatay kas maysa nga “inhuman, savage manner.”
Ti naranggas a demonstrasion ket kagiddan dagiti protesta a nangrugi idi Disiembre 28 gapu kadagiti problema iti ekonomia ti Iran ken panawagan a lippasenen ti panangidaulo ni Khamenei.
Basar iti United States-based Iranian Human Rights Activists News Agency (HRANA), saan a bumaba iti 3,090 nga indibidual ti pimmusay iti nalawa a protesta.
Nupay kasta, inadmitir ti envoy a marigatanda pay laeng a makumpirmaran ti eksakto a numero gapu iti internet blackouts.
Iti baet daytoy, binabalaw ni Khamenei ti Estados Unidos iti riribuk nga inawaganna ni United States President Donald Trump a “criminal” ken kunana a ti gagem ti Amerika ket sakupen ti Iran.
Inpetteng ti Supreme Leader a nasken a mapagsungbat ti Estados Unidos kadagiti riribuk idiay Iran.
Inaramid ni Khamenei ti rakurak kalpasan nga immuna nga insingasing ni Trump nga itultuloy ti protesta dagiti Iranians kagiddan ti pangta a makibiang ti Amerika no itultuloy ti panagriribuk ti Iranian security forces.
Inawagan ti gobierno ti Iran dagiti demonstrasion kas “riots” a maipagarup a rinugian dagiti kariri ti pagilian a napilitan nga agusar ti security forces ti kinaranggas a puersa nga adda dagiti damag nga adda dagiti video ti pammaltog.
Kabayatanna, nagtalinaed a 2% laeng ti normal ti internet connectivity idiay Iran basar iti cyber monitor a NetBlocks.
Iti baet a bimmaba dagiti report ti riribuk kadagiti naglabas nga aldaw, narigat nga agpakampante iti situasion gapu iti limitado a komunikasion.
Inbatad met ti United States State Department, agsagsaganan ti Iran kadagiti opsyon tapno rauten dagiti American bases ngem ballaag ti Amerika nga aniaman a klase a panangatake ket bumalesda a napigpigsa.
Naikkan ti partial withdrawal ti Estados Unidos ken United Kingdom ti personnel daytoy iti Al-Udeid air base idiay Qatar kas precautionary measure.
