LAOAG CITY – Indeklarar ni Iranian Supreme Leader Ayatollah Ali Khamenei ti lima nga aldaw a panagladingit iti intero nga Iran kalpasan ti pannakatay ni President Ebrahim Raisi.
Pimmusay ni President Raisi kalpasan a nagswek ti nagluganan na nga helicopter iti kabanbantayan a paset ti north-western Iran, kadwa na ni Foreign Minister Hossein Amir-Abdollahian ken innem a sabsabali pay.
Indanun met ni Ayatollah Khamenei ti pannakipagladingit na iti amin nga umili idiay Iran gapu iti pannakapukaw da ken ni President Raisi.
Ni Raisi ti mapapati a dakkel ti potensyal na nga agbalin a successor ni supreme leader Ayatollah Ali Khamenei.
Nangrugi metten a nangipaay ti tribute dagiti nagduduma a pagilian kas iti India, Pakistan, China, Russia, Poland, Turkey, Afghanistan, Qatar, Iraq, Venezuela ken dadduma pay.
Kabayatanna, nadutukan ni Vice-President Mohammad Mokhber kas interim President idinto a napili ni deputy Foreign Minister Ali Bagheri Kani kas acting foreign minister iti Iran.
Maiyuswat ti presidential election kalpasan ti 50 nga aldaw.
