LAOAG CITY – Tinamaan ti serye ti airstrikes ti Kharg Island iti Persian Gulf sumagmamano nga oras sakbay ti inkeddeng a deadline ni United States President Donald Trump para iti Iran a lukatan manen ti Strait of Hormuz.
Basar iti report ti Iranian media, napipigsa a panagbettak ti nangngeg iti isla a kangrunaan a terminal ti langis ti pagilian no sadinno a dumaldalyasat ti agarup amin nga oil exports ti Iran.
Nailadawan ditoy dagiti panangatake kas coordinated strikes manipud iti inawaganda nga “American-Zionist enemy.”
Napuskol nga asok ti nakita manipud iti isla a nabayagen nga ibilbilang a “crown jewel” ti oil infrastructure ti Iran.
Kagiddan daytoy, inpadamag ti Israeli military a nakumpletoda ti nalawa nga operasion kontra kadagiti nagduduma nga “infrastructure sites” iti Iran.
Karaman kadagiti natamaan ti maysa a rangtay nga asideg ti Qom ken maysa a railway bridge iti Kashan no sadinno dua ti natay ken tallo ti nasugatan.
Maipalagip nga idi Marso, inbatad ni Trump a “totally obliterated” ti United States forces dagiti military targets iti Kharg Island ngem pinilina a saan pay laeng a dadaelen ti oil facilities.
Ti baro a panangatake ket makitkita nga ad-adda a kumaro a posible a mangitunda ti panagdanag iti suplay ti langis iti intero a lubong ken mangpakaro iti agdama a krisis iti Middle East.
