LAOAG CITY – Imbatad ni Vice Mayor Atty. Ferdinand Ignacio iti ili ti Paoay ti umuna a rason da no apay a pinaayaban da dagiti Presidente ti zanjera ket maitunos iti direktiba ni Presidente Ferdinand Marcos Jr. a mangipasa iti ordinansa no kasano a malapdan dagiti epekto ti El Niño Phenomenon.
Namunganay daytoy kalpasan nga adda nabay-bay-an a maysa nga irrigation canal iti ili ti Paoay.
Segun ken ni Ignacio, ikagkagumaan da a maala ti biang dagiti presidente ti kada-zanjera pakairamanan dagiti Punong barangay iti nadakamat nga ili tapno ammu da dagiti maiyannatop a wagas ken solusyon gapu iti kinakurang ti danom.
Kunana nga umabot ti lima a barangay ti maap-apektaran pakairamanan ti Barangay Sungadan, Barangay Nalasin, Barangay Bacsil, Barangay Surgui ken Barangay San Agustin ken isuda metten ti kangrunaan a recipient iti maputar a programa.
Nammuan a ti danom nga agkamang kadagiti irigasyon ket manipod pay laeng iti Paoay Lake, no sadinno nga adda da sumagmamano a paset ti irrigation canal iti Barangay Nalasin ken Barangay Surgui a nakurkoran ken nagabgaburan.
Kuna na a ti umuna a wagas a napanunot da ket masapol a makalyan iti kabiitan a panawen dagitoy, ken papintasen pay ti irrigation canal iti nadakamat nga ili.
Mainaig iti daytoy ket adda naiyalokar a 500,000 a pisos it kada tawen nga aggapo iti local government unit para iti maintenance ti irigasyon.
Kabayatanna, kalikagom ni Ignacio a maikkan ti solusyon daytoy a problema dagiti mannalon wenno dagiti gunglo ti zanjera babaen ti panagtinnulong da ken ni Mayor Shiella Galano.
