LAOAG CITY – Nangiparuk-at ti Local Government Unit iti ili ti Dingras ti Executive Order No. 081 Series of 2021 para iti pannakaobserbar iti pyesta ti minatay iti nasao nga ili.
Basar iti inparuk-at ni Mayor Joefrey Saguid nga Executive Order, adda ti naited nga iskedyul iti nagduduma a Barangay iti nasao nga ili ken isu laeng ti aldaw ti pannakaipalubos dagitoy a sumrek iti kamposanto.
Babaen iti nasao nga addang, makontrol ti bilang dagiti mapan bumisita ken mapagtalibaen ti pannakaobserbar ti health protocols.
Dagiti sumaganad ti iskedyul iti tunggal barangay nga agturong iti kamposanto:
October 18-19 iti Brgy. Bagut, Mandaloque, San Esteban, San Marcos ken Sagpatan.
October 20-21 iti Brgy. Barong, Lanas, Elizabeth ken Ver.
October 22-23 iti Brgy. Baresbes, San Francisco, San Marcelino, Saludares ken Sulquiano.
October 24-25 iti Brgy. Espiritu, Capasan, Bacsil, Root ken Cali.
October 26-27 iti Brgy. Suyo, Bungcag, Peralta ken Puruganan.
October 28-29 iti Brgy. Lumbad, Foz, Medina ken Parado.
October 30-31 iti Brgy. Madamba, Albano, Dancel ken Guerrero.
Kabayatanna, November 3-4 ti pannakaipalubos a bumisita kadagiti aggapo iti dadduma nga ili wen siudad.
Segun ken ni Saguid, naiget a maipatungpal ti pagaladagan kas iti pannakalimtar ti saan nga ad-ado ngem 15 a miembro ti agturong iti kamposanto ken san nga agsurok ti 40 a porsiento iti venue capacity.
Mapaigetan ti pannakaiyimplementar ti “No Facemask, No Entry” Policy kasta pay ti panangsurot iti Social Distancing iti innem a kadapan ken dua a metro a panaginnadayo iti tumunggal maysa.
Temporario met a nasuspinde ti age restrictions a mapan bumisita kadagiti kapamiliada a pimmusay.
Mangiyestablisar ti Municipal Health Office ti sanitizing ken thermal scanning booth kadagiti pagserrekan iti kamposanto.
Maipakat pay ti one entrance ken one exit point tapno maliklikan ti panagdudupudop iti lugar.
Mainaig iti daytoy, naiget met a maipawil ti panaglako kadagiti makan, mainom, kandela, ay-ayam ken sabsabong iti uneg ti kamposanto pakairamanan a maipawil pay ti mangitugot ti deadly weapons, videoke, karaoke, banda, musiko, boomboxes, loud speakers ken consumption ti alcoholic drinks.
Kabayatanna, agbinnulig dagiti Barangay Officials, Dingras PNP, Dingras BFP ken dadduma pay nga otoridad a mangbayabay kadagiti umili.
