LAOAG CITY – Nangiparuk-aten ti lokal a gobierno ditoy siudad ti Laoag ti iskedyul para iti screening dagiti agbalin a kandidata ti Laoag City Miss Pamulinawen 2025.
Maiyuswat ti umuna nga screening inton Enero 10 iti oras ti alas singko ti malem idinto a ti maikadua ket inton Enero 11 iti oras ti alas tres ti malem iti Laoag City Auditorium.
Segun ken ni Atty. Charito Malicad, Officer In Charge ti City Tourism Office ditoy siudad ti Laoag, dagiti kasapulan a requirements para kadagiti agaplikar iti nasao a beauty pageant ket nasken nga adda ti katayagna a 5’4 agpangato, birth certificate wenno sertipikasion a mangipaneknek a residente ditoy siudad.
Inbatadna a 16 ti masapol a kandidata para iti search for Miss Laoag City Pamulinawen 2025.
Kunana a maisayangkat ti pre-pageant iti nasao a kompetision inton Pebrero 5 ken ti Coronation Night ket inton Pebrero 12 iti Ilocos Norte Centennial Arena.
Inlawlawagna a ti makagun-od ti first place ket mangabak ti 100 a ribu a pisos, 50 a ribu a pisos para iti second place, 30 a ribu a pisos para iti third place, 20 a ribu a pisos para iti fourth place ken 10 a ribu a pisos para iti fifth place.
Innayonna nga adda dagiti naimbitaran a nalalatak nga artista iti lubong ti pageantry nga agbalin nga hurado para iti Laoag City Miss Pamulinawen 2025.
