LAOAG CITY – Dumaldalan iti pannakaadal a naimbag dagiti dokumento nga insubmitir dagiti iskolar ti gobierno probinsial para iti pannakaipabaro ti scholarship dagitoy.
Daytoy ti inpakaammo ni Mrs. Carolyn Juan Agcaoili, Research Education Assistant 1 ti Provincial Education Office.
Inbunannagna a nakaisubmitir amin kadagiti kasapulan a dokumento dagiti iskolar ti probinsia iti napalabas nga umuna a semestre.
Mainaig iti daytoy, inlawlawagna a ti bilang dagiti iskolar iti Agriculture and Fishery nga adda iti kolehio ket 133 idinto a dagiti adda iti sekondaria ket 257, Academic Scholar 395, Sirib Young Leaders Scholars 250, Juris Doctor 10, Doctor of Medicine 12, Techvoc Scholar 68, Arts Scholar 230 ken Senior High School 419.
Inbatadna a dagiti agdama nga iskolar ti Senior High School ti maudin a bansada iti daytoy nga scholarship program.
Kuna ni Agcaoili nga apaman a malpas ti isaysayangkatda a panangberipikar ket mairugi a dagus ti pannakaiproseso ti pannakaipaay ti stipend dagiti maseknan a kas iti kalikagum ni Gob. Matthew Marcos Manotoc.
Innayonna nga iti daytoy, maikadua a semestre ti School Year 2023-2024 ket awan dagiti maala a baro nga iskolar ti probinsia.
