LAOAG CITY – Maysa nga iskultor idiay England ti nakastrek iti Guinness World Records kalpasan a napartuatna ti kabassitan nga sculpture ti maysa a Lego brick a kadakkel laeng ti red blood cell.
Ni David A. Lindon manipud idiay Bournemouth ti adda iti likudan ti work of art nga adda ti rukodna a 0.02517 milimeter by 0.02184 milimeter.
Bassit ngem uppat a daras maidasig iti dati a record holder para iti titulo nga “Smallest Sculpture Made by Hand.”
Gapu iti kinabassit daytoy, kinasapulan pay a nagusar ti light microscope ti maysa a team manipud iti Evident Scientific para iti opisial a marukod ti obra ni Lindon.
Malaksid iti record-breaking a pedaso, nangaramid pay isuna ti dua a dakdakkel a bersion ti Lego brick.
Saan nga ang-angaw ti panangaramid ti nasao nga sculpture.
Inbatad ni Lindon, kasapulan a kontroladona ti tunggal garaw pakairamanan ti pitik ti pusona.
Gapu ta sensitibo iti aniaman a garaw, ar-aramiden ni Lindon ti sculpture-na tunggal rabii tapno maliklikan ti vibrations manipud kadagiti kotse ken dadduma pay a banag.
