LAOAG CITY – Saan pay laeng a mabalin a bisitaen dagiti turista ti Badoc Island iti Badoc Ilocos Norte.
Segun ken ni Mr. Jade Raquel, tourism officer iti nasao nga ili, ti rason no apay a saan pay laeng a mabalin a bisitaen dagiti turista ti nasao nga isla ket gapu ta awan pay naaramid a saritaan wenno katulagan iti nagbaetan iti agtagikua ken ti gobyerno lokal ti Badoc.
Ngamin kuna ni Raquel, ti Badoc Island ket kukua ti pribado a tao.
Malaksid iti nasao a rason, kiniddaw pay ti agtagikua a maiplastar a naimbag dagiti pagannuratan iti iseserrek iti isla kas koma no kasano a matagiben ti kinadalos.
Ti Badoc Island ket kakaisuna nga isla iti Ilocos Norte ken awan pay ti naipatakder nga istruktura.
