LAOAG CITY – Inbilin ti Israel kadagiti Palestinians nga agbakwit manipod iti northern Gaza gapu iti pannakapaiget ken pannakaipalawa ti operasyon dagiti miltar kabayatan nga ilunglungalong ni US President Donald Trump ti pannakaipatungpal ti ceasefire iti rehiyon.
Nabalakadan dagiti tattao iti kaparanget a lugar ti Gaza City ken Jabalia nga agpaabagatan da paylaeng iti coastal area ti al-Mawasi.
Immunan a naireport nga umabot iti 86 a tattao ti natay kalpasan ti panangipabanto ti Israel kadagiti missiles iti uneg ti 24 nga oras.
Karaman dagiti natay ket ti tallo nga ubbing nga agnanaed iti maibilang a “safe zone” iti al-Mawasi.
Inpaganetget ni President Trump ti pannakaipatungpal ti ceasefire iti Gaza ken isalakan dagiti hostages manipod iti Hamas.
Maipalagip nga inrakurak ni Trump idi sabado a manarimaan ti pannakinegosyar ni Israeli Prime Minister Benjamin Netanyahu para iti ceasefire deal iti nagbaetan da iti Hamas.
