LAOAG CITY – Rinugyanen dagiti tropa ti Israel ti nangmandar kadagiti Palestinians a pumanaw da iti daya a paset ti Rafah sakbay ti panangiyuswat da ti operasyon iti southern Gaza city.
Umab-abot iti 100,000 a tattao ti nabilin nga agturong iti “expanded humanitarian area” iti Khan Younis ken al-Mawasi.
Inbatad ti Israel a kalpasan ti pito a bolan ket masapol a mapasubli dan ti Rafah tapno naan-anay a maparmek da ti Hamas.
Nupay kasta, nagballaag ti United Nations ken ti Estados Unidos a ti ipatungpal nga operasyon ti Israel iti Rafah a pagnanaedan ti nasurok maysa a milyon a Palestinians ket nakaam-amak ti pagbanagan na.
Maipalagip a ti inpabanto nga air strikes ti Israel iti Rafah iti kallabes ket nakatayan ti 19 a Palestinians.
