LAOAG CITY – Inpanakkel ti Israel a napatay da ni Raed Saad, maysa a nangato a commander ti Hamas, iti maysa a targeted strike iti Gaza City.
Naamoan a ni Saad, ti mangidadaulo iti panagaramid ti armas ti Qassam Brigades, ti militar nga iggem ti Hamas, ket maibilang a maysa kadagiti kapatgan a lider ti grupo ken addaan ti dakkel a papel kadagiti panagatake iti Israel idi Oktubre 7, 2023.
Basar iti Hamas-run Civil Defense, uppat nga indibidual ti napatay iti strike, ken naruay a sabsabali pay dagiti nasugatan.
Kinumpirmaran met ti maysa a lokal nga opisyal ti Hamas a karaman kadagiti natay ni Saad ken ti kadwa na a ni Abu Imad al-Laban.
Inrakurak pay ti IDF ken Shin Bet a ni Saad ket responsable iti pannakatay ti aado a soldado iti Gaza gapu kadagiti panagbomba.
Nabayagen a puntirya ti Israel ken namin-adon a daras a nagandat a mapapatay, karaman ditoy ti operasyon iti Gaza City idi Marso 2024 no sadinno a nakalibas ni Saad.
Napasamak ti strike a nakatayan ni Saad iti paset ti Gaza a kontrolado dagiti Palestino, iti maaw-awagan a Yellow Line, a manggudwa ti Gaza kalpasan ti ceasefire no sadinno a ti Israel ket addaan ti kontrol iti abagatan a paset ti Gaza.
