LAOAG CITY – Immanugot ti Israel ken Hezbollah a biagen manen ti ceasefire iti baet dagiti panaglabsing iti immuna a katulagan.
Ti baro a ktulagan ket naipatungpal iti babae ti Estados Unidos ken adda dagiti naiget a kondisyon para iti agsumbangir a partido.
Naamoan a dagiti kangrunaan a kondisyon ti katulagan ket ti panagsanud ti Hezbollah iti daya ti Litani River, a sumuruk-kumurang a 30 a kilometro ti kaadayo a manipod iti border ti Israel.
Karaman pay kadagiti kondisyon ti in-inot a panagsanud dagiti tropa ti Israel manipod iti southern Lebanon agturong iti paset ti border da.
Ti laeng Lebanese Armed Forces ken dagiti tropa ti United Nations peacekeeping ti mapalubusan nga agtalinaed iti “buffer zone” iti lauden ti Litani River.
Nagtalinaed met ti takder ti Israel a karbengan da ti sumubbot kontra iti Hezbollah no adda dagiti nakaplano a panagatake wenno panaglabsing iti ceasefire.
Gapu iti nasao a katulagan ket rinibo a residente a nagbakwit ti nakasublin iti bukod da a pagtaengan iti southern Lebanon.
