LAOAG CITY – Inbatad ti pannakangiwat ti Israel Defense Forces a ni Daniel Hagari a plano ti Israeli Forces nga iyad-ado ken iyun-uneg pay dagiti ipatungpalda nga strikes iti Gaza.
Iti press conference, inlawlawag na a babaen iti nasao nga addang ket nababbaba ti risgo kadagiti tropa da iti iyuswat da a sumaruno nga stages ti gubat iti nagbaetan da iti Hamas.
Gapu iti daytoy, ginutigot ni Hagari dagiti residente iti Gaza City a mapan da paylaeng agnaed iti South Gaza tapno masigurado ti kinatalged da.
Rinugyan ti Israeli military iti nangiyuswat ti retaliatory airstrikes iti Gaza kalpasan ti surpresa nga iraraot ti Hamas iti Israel, addan dua a lawas ti napalabas a nakatayanen ti nasurok nga 4 a ribo a tattao.
Immunan nga inrakurak ti Israel ti panangiyuswat da ti naiget a ground offensive iti Gaza Strip iti kabiitan a panawen, ngem ti aldaw a panangipatungpal da ket awan pay ti makaammo.
