LAOAG CITY – Naminsan manen a nagballaag ti Israel iti Hamas a saanda nga agsardeng iti airstrikes agingga a naan-anayen a mawaya-wayaan dagiti hostage nga iggemda.
Segun ken ni Israeli Defense Minister Israel Katz, addan dagiti puersada a nakasaganan a mangsakup ti dakkel a paset ti Gaza.
Inabisoanda dagiti residente ti Gaza nga agibakwit para iti panagsagsagana ti napigsa nga airstrikes.
Inpetteng ti Israel nga agingga nga ipatpatangken ti Hamas a saanda nga paruk-atan dagiti hostage-da ken adu pay a teritorio ti sakupen ti Israel.
Immunan nga inrakurak ti Hamas a manarimaanen ti pannakikoordinarda kadagiti mediators a pagilian kas iti Qatar ken Egypt tapno lappedan ti panangraut ti Israel ken agsublida iti ceasefire.
Maipalagip nga iti napalabas a dua nga aldaw ket saan a bumaba iti 500 nga indibidual ti pimmusay gapu iti airstrike ti Israel.
