LAOAG CITY – Nakasagana ti Israel iti posible a pannakairamraman na iti susik iti nagbaetan ti Iran ken Estados Unidos.
Inbatad daytoy ni Elvie Selario Aviador, taga Koronadal City ngem agtrabtrabaho idiay Tel Aviv, Israel ken maysa a caregiver.
Reaksyon daytoy ni Aviador kalpasan a nagpangta ti Iran a no subbuten ida ti Amerika kalpasan a nagipabanto da ti dinosdosena a missiles ket posible a mairamraman ti pagilian a pagtrabtrabahuan na.
Inpalagip ni Aviador nga idi rimmaot ti Pakistan ken Turkey idiay Israel ket saan da a nagballigi gapu iti kaadda iti mekanismo ti armada ti Israel a mangsaed kadagiti aniaman a maipabanto kadakuada.
Inlawlawag na nga amin nga inpabanto dagiti dua a pagilyan kontra iti Israel ket saan pulos a nagdisso iti daga gapu ta iti pay laeng tangatang ket pinabettaken dagiti tropa ti Israel.
Innayon na a kampante da gapu ta nakasagana a kanayun ti Israel ken nasanay dan a makangkangngeg kadagiti mapab-pabettak a bomba.
