LAOAG CITY – Inruaren ti report manipud iti United Nations Commission of Inquiry ti nangibaga a nangiwayat ti genocide ti Israel idiay Gaza ken dagiti nangangato nga opisial daytoy pakairamanan ni Prime Minister Benjamin Netanyahu a nangipursige kadagitoy a krimen.
Basar iti report, uppat kadagiti lima nga akto ti genocide ti inwayat ti Israel pakairamanan ti panangpatay, panangdangran iti bagi ken panunot ken panangparigat iti panagbiag.
Inbatad ni Navi Pillay, dati a judge ti International Criminal Court a nalawag ti intension ti Israel a patalawen ti grupo a Palestino idiay Gaza.
Nupay kasta, naiget a naglikudan ti Israel ti report ken inawaganna daytoy nga “scandalous” ken maipagarup nga aramid dagiti “Hamas proxies” basar iti ambassador-da iti United Nations iti Geneva.
Nagkedked ti Israel a makitinnulong iti imbestigasion ken inpettengna ti karebbengan daytoy nga ikalintegan ti bagina kalpasan ti panangatake ti Hamas kadakuada idi Oktubre 2023.
Iti agdama, addan ti sumurok 64 a ribu nga indibidual ti pimmusayen idiay Gaza basar iti Gaza Health Ministry idinto nga agtultuloy ti krisis iti panagbisin iti rehion.
Kabayatanna, iti baet a saan nga opisial a binigbig ti United Nations ti termino a “genocide,” ket kumarkaro ti panawagan manipud iti international community nga agtignay kontra kadagitoy a krimen.
