LAOAG CITY – Nangiyuswat ti airstrike ti Israel iti paset ti laud ti Syria kalpasan ti report nga adda ti projectile missiles a pinabettak ti Syria agturong iti Israel, nupay saan a nangitunda ti perdisyon.
Inakusaran ti Israel ni Syrian interim President Ahmed al-Sharaa a maipagarop a responsable kadagiti panagatake.
Nupay kasta, inbatad ti Syria a dagiti airstrike ket maysa a panaglabsing iti soberanya da ken gagem a pabagsaken ti nadakamat a pagilian.
Maipalagip a sipud bimmagsak ti rehimen ni Bashar al-Assad idi Disyembre 2024, pinapigsa ti Israel dagiti opensiba na kontra iti Syria.
Kabayatanna, kinondenar ti United Nations dagiti panagatake ti Israel, bayat nga inrakurak ti Estados Unidos ti panangibabawi da kadagiti pannusa nga inpataw da iti Syria sipud pay idi civil war a nakatayan ti nasurok nga 600,000 a tattao.
