LAOAG CITY – Manamnama a bumisita idiay Estados Unidos ni Israeli Prime Minister Benjamin Netanyahu inton sumaruno a bulan.
Daytoy ti umuna a gundaway a bumisita ni Netanyahu idiay Estados Unidos sipod nangrugi ti rinnupak iti Gaza.
Manamnama nga agbitla ti Israeli Prime Minister iti US Congress.
Immuna iti daytoy, nagpanawagan ni Netanyahu iti Estados Unidos a no mabalin ket alistoanda ti panangipaay kadagiti armas kadakuada.
Adda iti Estados Unidos metten ni Israeli Defense Minister Yoav Gallant tapno makitaripnong kada US Secretary of Defense Lloyd Austin ken US Secretary of State Antony Blinken.
Inbatadna a nakasaganada iti aniaman a baro nga addang nga aramidenda kontra iti Gaza, Lebanon ken dadduma pay a lugar.
