LAOAG CITY – Inpetteng ni Israeli Prime Minister Benjamin Netanyahu a saan to pulos a mapasamak ti Palestinian state.
Inpalgak na pay a dagiti world leaders a nangideklarar ti panangbigbig na iti Palestinian state ket inpaayan da laeng ti dakkel a gunguna iti terorismo.
Inrakurak daytoy ni Netanyahu kalpasan nga inwaragawag ti United Kingdom ti panangbigbig a ti Palestinian state.
Maipalagip nga immunan a binigbig ti Australia, Canada ken Portugal ti Palestinian state, ken manamnama a sumaruno met nga iwaragawag ti France.
Mainaig iti daytoy, inkalintegan ni United Kingdom Prime Minister Keir Starmer a ti desisyon da ket saan a maysa a gunguna iti Hamas gapu ta mabalin nga awanen ti masakbayan, awan ti agbalin nga akem iti gobierno ken awan ti akem da iti seguridad.
Kuna na a ti panagpanawagan da para iti naimpapusoan a solusyon ket isu ti eksakto a kabaliktaran ti “hateful vision” ti Hamas.
Inbatad na pay a ti nasao nga addang ket karida kadagiti Palestinian ken Israeli nga adda pay ti napinpintas a masakbayan da.
Innayon ni Starmer a ti nakaro a panagbisin a mapaspasamak iti Gaza ket saanen a maibturan no sadinno a ti pannakatay ken pannakadadael ket nakabutbuteng para iti amin.
Kabayatanna, naragsakan ni Palestinian Authority President Mahmoud Abbas iti nagbalin a desisyon ti United Kingdom.
