LAOAG CITY – Napan bimmisita ni Israeli Prime Minister Benjamin Netanyahu idiay Estados Unidos bayat iti panang-pressure kenkuana ni US President Donald Trump tapno umanamong iti baro a ceasefire deal iti Gaza.
Immunan nga inrakurak ni Trump a nagbalin da a natibker ken ni Netanyahu maipanggep iti kalikagom a panagngudon ti riribok iti nagbaetan ti Israel ken Hamas iti Gaza.
Kuna na met ni Netanyahu a naiget ti panagtrabaho da tapno magun-od ti katulagan a natratar iti kallabes iti babaen metlaeng dagiti napagnunumoan da a kondisyon.
Maipalagip a ti saan a direkta a panagsarita iti nagbaetan ti Israel ken Hamas iti maysa a lungalong nga inisponsora ti Estados Unidos para iti 60-day ceasefire ken pannakawaya-waya dagiti nabatbati nga hostages ket naituloy idiay Qatar idi rabii ti domingo.
