LAOAG CITY – Inlawlawag ni Israeli Prime Minister Benjamin Netanyahu a ti military operation-da iti Rafah ket addaan ti dua a gagem.
Inbatadna a ti umuna a kalikagumda ket ti panangrautda iti Rafah tapno naan-anayen a maabakda ti Hamas ken maikadua ket tapno mawayawayaan dagiti hostage.
Apaman a nakastrek ti Israel iti Rafah ket inngatoda ti banderda ken inikkatda ti bandera ti Hamas.
Inpettengda a ti panangawat ti ceasefire ti Hamas ket maisupadi iti pammati ti Israel isu a saanda a baybay-an ti kinatalged dagiti kailianda.
Mainaig iti daytoy, naminsan manen a nagpanwagan ni United Nations Secretary General Antonio Guterres a saanen nga ituloy ti Israel ti panangrautda iti Rafah gapu ta adu dagiti sibilian ti mairaman.
Immapela pay daytoy kadagiti pagilian a no mabalbalin ket usarenda ti impluwensiada nga iyakar ti Israel ti atension daytoy malaksid iti Rafah.
Naammoan a ti nasao a panawagan ket gapu iti panangrugi ti Israel iti panangrautda iti Rafah.
