LAOAG CITY – Manamnama nga ipalgak ni Israeli Prime Minister Benjamin Netanyahu ti kinapudno maipapan iti gubat kontra Hamas idiay Gaza apaman ti isasango na iti United States Congress inton Hulio 24 bayat ti panagbisitana idiay Washington.
Malaksid iti daytoy ket manamnama pay a makisarita ni Netanyahu iti joint session ti United States House of Representatives ken Senate iti laksid ti agtultuloy a gubat iti nagbaetan ti Israel ken Hamas.
Saan pay a nalawag no makipagkita met ni Netanyahu ken ni United Sttaes Pres. Joe Biden bayat ti panagbisitana idiay America.
Kinuna ti Israeli Prime Minister a maragsakan isuna gapu ta naikkan iti pribilehio a mangibagi iti Israel tapno ipakaammu na ti kinapudno maipapan iti aw-waganna a gubat kontra kadagiti agkalkalikagom a mangperdi iti pagilianda.
Nakailanad met iti imbitasion ti Prime Minister, no sadinno nga inbatad da House Speaker Mike Johnson ken Senate Minority Leader Mitch McConnell a namnamaenda a gundawayan ti lider ti Israel a mangilawlawag iti sirmata ti gobierno ti Israel para iti panangidepensada iti demokrasia, pananglaban iti kinaranggas ken pananggun-od iti kanayon a talna iti lugarda.
Maipalagip nga idi napan a bulan, nagaplikar ti International Criminal Court prosecutor para kadagiti arrest warrant kontra ken ni Prime Minister Netanyahu ken ti defense minister-na a ni Yoav Gallant gapu kadagiti maidardarum kadakuada a mainaig iti agtultuloy a gubat.
