LAOAG CITY – Inpakaammu ti Direktor ti ospital idiay Gaza a naruay dagiti nadadael a pasdek, partikular dagiti pasdek pagadalan idiay Gaza gapu iti panangraut ti eroplano ti Israel.
Nangitunda pay daytoy ti pannakatay ti agarup sangagasut a tattao, ken sabsabali pay a nasugatan.
Kinuna ni Fadl Naeem, mangidadaulo ti al-Ahli Hospital a nakaipanan ti adu kadagiti nasugatan, dagiti biktima ket nakasapasar ti nakaro a sugat.
Kinunana nga ibilang da daytoy a “catastrophic” a kasasaad, ken saan a kabaelan dagiti doktor nga agasan dagidiay nakaro a nasugatan.
Innayon met ti pannakangiwat ti Israel Defense Forces (IDF) a ti pagadalan ti al-Taba’een ket nagserbi a kas aktibo a pasilidad ti militar ti Hamas ken Islamic Jihad nga addaan iti agarup a 20 a militante nga agtartrabaho idiay ngem inlibak daytoy ti Hamas.
Maipalagip nga immunan a rinaut ti Israel ti sumagmamano a pagkamangan idiay Gaza iti napalabas a sumagmamano a lawas.
Segun iti United Nations, 477 kadagiti 564 a pasdek ti pagadalan idiay Gaza ti direkta a nadungpar wenno nadadael agingga idi Hulio 6, a di kumurang 14 ti pakabuklan a pasdek ti napuntiria sipud idin.
