LAOAG CITY – Kiniddaw ni Senate President Juan Miguel Zubiri ti pannakaisubli ti school calendar iti bulan ti Hunio agingga Marso gapu iti kankanayon a pannakakanselar ti face-to-face classes gapu iti nabara a panawen.
Segun ken ni Zubiri, nasken nga agtignay dagus ti Department of Education ken Commission on Higher Education ken isubli ti pre-pandemic calendar inton masungad nga school year nga imbes nga in-inut a pannakaisubli ti School Year 2025- 2026.
Inbatadna a napeggad iti salun-at ti napudot a paniempo isu a masapol a mailiklik dagiti mangisursuro ken agad-adal iti agdama a situasion.
Inlawlawagna nga inbabawina ti Senate Bill No. 788 nga inpilana iti panangrigi ti 19th Congress a nag-synchronize ti school year a mangrugi iti bulan ti Agosto.
Innayonna nga idi nangrugi ti panagsuspinde ti klase gapu iti nabara a panawen idi Abril 4 ket adda ti pakabuklan nga uppat a ribu a pagadalan ti nagsuspinde ti face-to-face class ken immakar iti asynchronous ken distance learning modes idinto nga idi Abril 12 ket dimmanon iti pito a ribu a pagadalan.
