LAOAG CITY – Inbatad ni Barangay Chairwoman Marvelyn Padayao iti Brgy. 37, Calayab ditoy ciudad ti Laoag a naurnusen ti aniaman a saan da a nagkikinnaawatan kadagiti beach owners iti D’ sierto beach resorts iti met laeng nadakamat a barangay.
Immun-una iti daytoy, nagsinnungbat ken nagbinnara da Kapitana Padayao ken ti maysa kadagiti beach owner iti D’ sierto beach resorts a ni Mrs. Cely Buyat kalpasan a naidanun iti naud-udi a maipagarop nga ididiaya dagiti agbanbantay iti checkpoint a no iti barangay cottage ti papanan dagiti beachgoers ket libre ti panagshower da.
Inadmitir ni Buyat a nakapungtot iti naamoan na gapu ta no kastoy a kanayun ti maaramid ket dakkel ti posibilidad na nga awanen ti mapan iti paupaan da a cottages idinto nga agbaybayad da para iti negosyo da.
Gapu iti daytoy, kinasarita ni Buyat ti kapitana no sadinno nga inpeksa na ti sakit ti nakem na.
Iti met biang ni Padayao, saan a pudno a iyab-abog da dagiti beachgoers iti barangay cottage ta no ar-aramiden da daytoy ket kanayun koman a mapunno dagiti paupaan da a cottage ken awan koma ti mapan iti D’ sierto beach resorts.
Innayon na a gapu iti nasao nga isyu ket nagsasarita da kadagiti maseknan ken nasolbar da a dagus ti timpuar a problema iti nagbabaetan da.
Inpakaammo ni Kapitana Padayao a napagnunumoan da a tapno awanen ti tumaod a problema ket agpapada da laengen ti panagsingir iti cottage ken uray iti shower.
