LAOAG CITY – Namnamaen nga aguray ti naunday a panawen sakbay a possible a makabiruk ti solusyon iti isyu iti nagbaetan ti Pilipinas ken China mainaig iti West Philippine Sea.
Daytoy ti inbatad ni Prof. Karl Lenin Benigno, political analyst iti NorthWestern University (NWU) ditoy ciudad ti Laoag.
Segun kenkuana, sabali ti panakita ti China iti sitwasyon ken sabali met ti pagtaktakderan iti Pilipinas.
Kuna na a masapol nga ikonsiderar ti isyu a saan a dispute gapu ta ti Pilipinas ti addaan ti legal a pagtaktakderan iti paggin-innagawan a teritoryo.
Inrakurak na no ti Pilipinas ket exclusive economic zone iti lugar a maaw-awagan ti West Philippine Sea.
Inlawlawag pay ni Benigno a ti maibagbaga a West Philippine Sea ket saan a ti sibubukel a South China Sea no di ket paset laeng ti exclusive economic zone ti Pilipinas a naipaay babaen ti desisyon ti International Tribunal of the Law of the Sea a naiyetnag paylaeng idi 2016.
Innayon na a naipaduyakyak ti sangalubungan a ti West Philippine Sea ket exclusive economic zone ti Pilipinas.
Nupay kasta, ti problema ket saan a nakipaset ti China ken saanna a bigbigen ti arbitral award a naipaay pabor iti Pilipinas isut gapuna nga ipilpilit ti China a kukua da ti nasao a teritoryo babaen iti history wenno pakasaritaan.
