LAOAG CITY – Sinungbatan dagiti uppat a presidential candidate nga immatendar iti Presidential Debate iti SMNI network seknan iti saludsod ni Mrs. Vilma Absalon, ti ina ti natay a dati nga UAAP MVP ken FEU booter a ni Keith Absalon, a maipagarup a nabettakan ti naimula nga IED idiay Masbate City.
Iti saludsod ni Mrs. Absalon, ket pakaseknan iti pannakaisardeng ken pannakapugipog kadagiti rebelde a grupo tapno awanen ti mapasamak a riribok ditoy pagilian ken saan a maitulad dagiti dadduma a tattao iti pannakatay ti anak na.
Immuna a nagsungbat ni dati a Senador Bongbong Marcos, a rumbeng laeng a depensaan ti gobyerno ti bukod na agraman dagiti tattao kontra iti terorismo.
Kuna na a nasken a maitultuloy ti peacetalks ken maitultuloy ti balik-loob program kageddan ti NTF-ELCAC wenno National Task Force to End Local Communist and Armed Conflict nga epektibo kontra iti nasao a problema.
Simmaruno ni Sec. Ernesto Abella, kuna na a masapul ti economic development, negosasyon iti biang lokal, ken pannakaituloy ti NTF-ELCAC.
Kuna na a narigat para iti ina a maawanan ti anak rason a rumbeng a maaddaan ti hustisya.
Maikatlo a simmungbat ni Labor rights activist Leodigario De Guzman, kuna na a kasapulan a maaddaan ti peacetalks tapno maisardeng ti riribok iti nagbaetan dagiti Pilipino ken rebelde a Grupo.
Inbatad na a panunuten nga adda ti rebulosyon wenno addaan ti panagalsa a resulta ti inhustisya ditoy pagilian, saan a pannakaipatungpal dagiti programa a pagbiagan dagiti tattao, saan a pannakaipatungpal ti reporma iti daga, social services ken dadduma pay.
Iti maikapat a nagsungbat ket ni dati a Sec. Norberto Gonzales, kuna na a naikkat ti linteg seknan iti rebulosyon rason nga agtennag a kaso criminal ti maipataw kadagiti nangaramid iti pannakatay ti ubing a football player.
Kuna na a rumbeng laeng nga agtignay ti gobyerno tapno mabirokan ti suspek ken mapilaan ti maiyannatop a kaso.
Pimmabor ni Gonzales iti sungbat ni De Guzman no sadino a masapul a mareview dagiti katulagan.
Kabayatanna, iti panagtultuloy ti topiko a pannakaipasardeng dagiti mapaspasamak seknan iti terorismo, kuna ni dati a Senador Bongbong Marcos a pudno nga addan dagiti panagalsa gapu ti inhustisya, ngem ketdi, ti mapagsasaritaan ket laban iti nagbaetan ti gobyerno ken kumunista a grupo.
Kuna na a saan a pabor iti idolohiya a maaw-awagan ti “arm struggle” gapu ta no maaddaan ti kinadamsak iti gobyerno ket makunan a rebelyon rason a saan a mabalin a mabaybay-an daytoy ngem ketdi protehiran ti estado.
Simmungbat met ni Ka Leody a no agtultuloy iti panagbisin, contractual a panagtrabaho, pannakaipatungpal ti Rice Tarrification Law, iti sector ti serbisyo a maipaay iti pribado ken pagsapsapulan ken maparparigatan dagiti tattao babaen ti nangato a presyo, ket saan nga adayo a maaddaan ti rebolusyon ken armado a pannakilaban.
Inbatad ni Ka Leody nga awan ti tao a kabaelan na ti lumaban iti gobyerno a kumpleto kadagiti armas.
Ngem gapu iti pakasaritaan ti pagilian a napasamak iti pannakapadusa, ken panagaramat ti dahas, pammapatay ken dadduma pay, iti panawen ni dati a Presidente Ferdinand Marcos Sr., Presidente Rodrigo Duterte ken dati a Presidente Gloria Macapagal Arroyo nga ado dagiti napapatay, banag a saan a kayat dagiti tattao.
Inpetteng met ni dati a Senador Marcos a saan a pabor iti ideolohiya nga addaan ti arm struggle tapno mapatumba ti gobyerno ken anyaman a makagapu ket awan iti paglintegan ti nasao a banag.
Maipalagip nga inrakurak ni Presidente Rodrigo Duterte iti napalabas a Talk to the People na nga awan pay ti napilina kadagiti kandidato a suportaran.
Kuna na a kwalipikado dagiti amin a presidential candidate malaksid iti pakaseknan ti pannakinegosiar paylaeng ti peacetalks iti kumunista a grupo iti baet nga adun dagiti natay a soldado ken pulis iti pannakisinnukat da ti putok kontra iti rebelde a grupo.
