LAOAG CITY – npasingked ni Mrs. Perlita Cabello, ti mangidadaulo ti City Social Welfare and Development Office (CSWDO) ditoy siudad ti Laoag nga ipaima da iti PNP ti isyu seknan iti nagviral iti social media a ladawan ti maysa a menor de edad a nakagalut ti saka ken ima na iti poste ti balay dagiti kalding.

Segun ken ni Cabello, kinasarita dan ti lalaki a nangipost ti ladawan a mapan agpalawag iti PNP tapno dita a maadal nu ana ti maiyannatop iti inaramidna.

Mainaig iti daytoy, kuna ni Cabello a ti laeng nakitada a madi ket ti pannakaipost  ti ladawan iti social media gapu ta posible a dakkel ti maited na nga epekto iti menor de edad a naigalot.

Nu pay kasta, saan da a nakita a madi ti pannakaigalot ti ubing gapu ta basar iti palawag dagiti maseknan, nagga-angawan da laeng daytoy.

Naamoan nga adda kuma ti panagsasarita dagiti ubbing ken ti nagannak da iti CSWDO ita nga aldaw ngem saan a nagturong dagiti maseknan isut gapu na a naiyalud-od daytoy.

Mainaig iti daytoy, manamnama nga agtultuloy ti maipaay a counselling kadagiti maseknan.

Maipalagip a nagviral iti social media ti ladawan ti ubing iti Brgy. Barit ditoy siudad gapu iti pannakaigalot ti ima ken saka na nu sadino a naikkan pay ti caption a maipagarup a nagguyod ti kalding ti ubing ngem basar iti palawag ket puro angaw laeng ti napasamak.

Kabayatanna, inbatad ni Pol. Chief MSgt. Hilda Flores iti Women and Children Protection Desk (WCPD) iti PNP Laoag nga inreport kadakuada ti CSWDO ti isyu seknan iti naigalot a menor de edad.

Kuna na nga inasistaran a dagus daytoy ti pulisya partikular iti WCPD.

Mainaig iti daytoy, inpakaamo na nga awan ti plano ti pamilya ti ubing a mangidarom iti nangipost ti ladawan iti social media.

Nu pay kasta, kuna na nga agtultuloy ti panangmonitor da iti menor de edad ken iti pamilya na.

Kabayatanna, inpetteng na a nu bilang adda ti maduktalanda a panangabuso iti nasao nga insidente, mismo a ti PNP ti mangipila ti reklao kontra iti nangipost ti ladawan.

Innayun na a nairekord ti isyu ken naiblotter tapno adda ti rekord nu bilang adda ti maipila a kaso.