LAOAG CITY – Inpakaamo ni ABC President George Padre iti ili ti Bacarra nga inyuman na kenni Sanngunian Bayan Member Winston Corpuz chairman ti Committee on Appropriations and Finance ti isyu seknan ti naladaw a pannakaibunong ti in-cash advance ni Barangay Chairman Derick Velasco iti Brgy. 40-Buyon iti nasao nga ili ken maipagarup a naipaay kadagiti adda ti mabalin na iti biag.
Nu pay kasta, kuna na nga awan pay ti nautuding nga aldaw para iti hearing iti nasao nga isyu.
Inbatad na a mapagsasaritaan tu pay daytoy iti sesyon ti Sanngunian Bayan.
Mainaig iti daytoy, kuna na a nu adda man ti matakwatan da ket maiyaramidan ti resolusyon a maipasa iti Commission on Audit.
Kabayatanna, inbatad ni Padre nga awan ti problema iti panagcash-advance ti kapitan agsipod ta kasapulan daytoy iti baet ti mapaspasaran a pandemiya ngem nasken a naibunong kuma nga insegida.
Maipalagip a nagkedked pay laeng a mangipaay ti naan-anay a detalye ni Velasco mainaig ti 330 a ribo a pisos nga in-cash advance na idi Mayo 9.
Nu pay kasta, inpetteng na a ti panag-cash advance na ket dimmalan iti husto a proseso ken kumpleto ti dokumento mainaig iti daytoy.
