LAOAG CITY – Maysa a naidumduma nga itlog a perpekto a nagbukel ti sukogna ti nailako iti balor iti sumurok-kumurang P21,000 idiay United Kingdom.
Ti naidumduma nga itlog a maibilang nga “one-in-a-billion” ket nagbalin a wagas tapno makaukkon ti pundo para kadagiti agtutubo nga agkasapulan ti suporta iti mental health.
Ti itlog ket immuna a naduktalan ti maysa a babai idiay Ayr, Scotland no sadinno a nagatangna daytoy iti maysa a local supermarket.
Naammoan a ni Ed Pownell, maysa a residente manipud idiay Lambourn, Berkshire ti immuna a nakagatang ti itlog iti balor a £150 kalpasan a nakitana iti maysa a pub.
