LAOAG CITY – Pormalen nga inwaragawag ni Ivory Coast President Alassane Ouattara ti panagpaidasigna para iti maikapat a termino na iti maisayangkat nga eleksyon iti nadakamat a pagilian intono Oktubre ita a tawen.
Iti statement, inbatad ti agtawen ti 83 a presidente a saan nga isyu ti salun-at na iti panagpaidasig na manen iti kina-presidente.
Inlawlawag na a ti nangiduron kenkuana a mangitultuloy ti panangidaulo na iti Ivory Coast ket tapno mapreserbar ti national stability iti baet dagiti karit iti seguridad ken ekonomiya iti nadakamat a pagilian.
Kabayatanna, naiget a kinontra da dati a President Laurent Gbagbo, dati a Prime Minister Guillaume Soro, ken dati a minister Tidjane Thiam ti plano ni Outtara nga agpaidasig para iti maikapat a termino na gapu ta maipagarop a mailabsing daytoy iti konstitusyon ti Ivory Coast.
