LAOAG CITY – Kiniddaw ni Jail Warden Benilda Sadian a maipadalan amin a balod iti Ilocos Norte Provincial Jail ti swab test.
Daytoy ket gapu pay laeng ti nagsasaruno a nagpositibo ti COVID-19 iti nadakamat a pagbalodan.
Segun kenni Sadian, agarup 151 dagiti PDLs nga agdama a nakabalod idinto a 26 dagiti empleyado iti INPJ.
Inlawlawagna a tapno maawan ti panagdandanagda karaman dagiti kapamilya dagitoy ket kiniddawna a maipadalan da amin iti swab test.
Kunana a dagus a pinagsisinada iti pagyanan dagiti primary, secondary contact ti nagpositibo ken naisina met dagiti awan ti exposurena.
Inbatadna a dagiti para luto ti kanen dagiti balod ket isuda ti mapan agibunong kadagiti makan a nakaPPE tapno masigurado a saanda a makaptans ti virus.
Inpasingked ni Sadian a kontrolado dan iti sitwasyon ti INPJ ken nasaganaandan no kasano da nga imanehar iti kaadda ti panagpositibo dagiti agpapaay iti nadakamat a pagbalodan.
Nagpanawagan ni Provincial Warden kadagiti kapamilya dagiti balod nga agisubmitir da ti Philhealth, Birth Certificate, ken Certificate of Indigency.
Iti agdama ket nakaquarantine dagiti 18 nga empleyado ti INPJ a dimmalan iti swab test ken manamnama a dumalan iti test dagiti balod a nakapulapol dagiti nagpositibo ti COVID.
Innayonna a saanen nga agaw-awid pay dagiti empleyado kadagiti pagtaengan da ken agtalinaedda pay laeng iti INPJ.
Maipalagip nga 6 dagiti nagpositibo ti COVID-19 nga emoleydo iti INPJ no sadinno a ti kaunaan a nairekord a kaso iti INPJ ket ni INC193 nga asawa ni INC187 nga empleyado iti PGIN.
