LAOAG CITY – Nagkedked paylaeng ni Jail Warden Edietor Guiang iti Ilocos Norte Provincial Jail a nangipaay ti komento mainaig iti naidanun nga impormasyon iti Bombo Radyo Laoag a pannakatay ti maysa a balud a sumangsango iti kaso mainaig iti illegal a droga ken naipisok iti Ilocos Norte Provincial Jail idi Hulyo 2022.
Basar iti impormasyon ti Bombo Radyo, naitaray iti Governor Roque Ablan Senior Memorial Hospital idi Enero 6 ita a tawen ti balud nga agtawen ti 46, taga Cabugao, Ilocos Sur ngem agnanaed iti ili ti Burgos, kalpasan a marigatan nga umanges ket adda ti agibbal a paset ti bagina.
Iti pannakaeksamen ti balud ket naduktalan dagiti doctor a kasapulan nga agdialysis ti mamindua a daras iti kada lawas ken naamoan nga adda pay ti sakit na a tuberculosis.
Nupay kasta, kabayatan ti kaadda ti balud iti nasao nga ospital partikular iti maysa nga isolation room ket maipagarop a nagtapwak iti tawa a poon metten ti nakatayan na.
