LAOAG CITY – Nagtalinaed iti ospital ti maysa a janitor kalpasan a naidungpar ti motorsiklo na iti puon ti mahogany iti paset ti National Highway ti Brgy. Parado iti ili a Dingras.
Nabigbig ti driver ti motorsiklo a ni Federico Ildefonso Jr. y dela Cruz, agtawen ti 34, naasawaan ken residente ti Brgy. 11 iti ili a San Nicolas.
Segun kenni Police Master Sergeant Neil Jan Andres, Imbestigador iti nasao nga insidente, bayat nga agpaabagatan a direksyon ti biktima ket ditoy a kellaat a naawanan ti kontrol ti manibela a nangitunda ti pannakaidungparna iti puon ti mahogany.
Inbatadna a gapu iti daytoy ket nagsagaba ti head injury ken sugat iti nagduduma a paset ti bagina.
Inpagunamgunamna nga awan met ti impluwensiya ti nasanger ti biktima.
Immuna a naitaray ni Ildefonso iti Dingras District Hospital ti biktima ngem dagus a naiyakar iti Mariano Marcos Memorial Hospital and Medical Center iti ciudad ti Batac.
