LAOAG CITY – Kinumpirmaran ti Philippine Navy a manarimaan ti pannakaipinal ti inspeksion para iti posible a pannakaiyakar dagiti barko a panggubat manipud iti Japanese Maritime Self-Defense Force.
Inbatad ni Philippine Navy Spokesperson Capt. John Percie Alcos, inimbitaran isuda ti Japanese Ministry of Defense para iti joint visual inspection ti sumagmamano nga Abukuma-class destroyer escort, dagiti barko a nadisenio para iti anti-submarine ken anti-ship warfare.
Target ti Philippine Navy dagiti kastoy a klase ti barko kas paset ti panangpatibker iti seguridad ken proteksion ti maritime domain ti pagilian.
Inbatad ni Alcos, iti agdama ket awan pay ti destroyer ti Pilipinas gapu ta dagiti Frigates ken corvettes ti adda pay laeng.
Kunana a mangipatulod ti Pilipinas dagiti eksperto tapno matingiting ti kondision ken kapasidad dagiti barko sakbay nga agdesision no alaenda dagitoy. Iti inisyal a report, adda ti innem nga unit ti destroyer escorts ti plano nga ipaay ti Japan ditoy Pilipinas kas paset ti panangpatibker ti alyansa ken gagem a mapagtalinaed ti kinakappia iti Indo-Pacific region.
