LAOAG CITY – Inkari ti Japan a mangipaay iti dua nga high-speed patrol boats iti Indonesia kas paset ti katulaganda iti seguridad.
Inpakaammo daytoy ni Japan Prime Minister Shigeru Ishiba kalpasan a nakipagkita ken ni Indonesian President Prabowo Subianto idiay Jakarta.
Nagsaritaan dagiti dua a lider ti pannakapapigsa ti maritime security, agraman ti teknikal a panagtitinnulong iti depensa. Maited dagiti patrol boat babaen ti Official Security Assistance.
Mainaig iti daytoy, napagnunumuan met ti panagtitinnulong iti decarbonized energy sector kas iti geothermal power, hydrogen, ammonia, ken biofuels.
Agtultuloy a papigsaen ti Japan ti katulaganna iti Southeast Asia kas paset ti estratehia a supsuportaran ti Estados Unidos tapno makontra ti agresion ti China iti rehion.
