LAOAG CITY – Nakairekord ti Japan ti 527 a kaso ti student suicide idi 2024, nangatngato daytoy ngem ti 514 a kaso idi 2023.
Daytoy ket basar iti preliminary data ti Ministry of Health, Labor, and Welfare iti Japan.
Manipod iti nasao a bilang ket 349 ditoy ti senior high school students, 163 ti junior high, ken 15 ti elementary students.
Naamoan nga ad-ado dagiti babbai nga umabot iti 288 ti nagpakamatay no ikompara kadagiti lallaki a 239.
Nupay ngimmato ti bilang dagiti nagpakamatay nga agad-adal ket bimmaba ti pakabuklan ti kaso iti Japan iti 20,268, ti maikadwa a kababaan a datos sipud idi 1978.
Ti kangrunaan a makaigapu iti panagpakpakamatay iti pagilian ket gapu iti problema iti salun-at, pinansyal ken problema iti pamilya.
