LAOAG CITY – Napagtalinaed ni Japanese boxing star Naoya Inoue ti panagbalinna kas undisputed super bantamweight title kalpasan nga inabakna ni Ye Joon Kim iti maikapat a round.
Iti rugi ti laban a naiwayat iti Ariake Arena idiay Tokyo, Japan ket nagbalin nga agresibo ni Inoue no sadinno a dagus a nakaraman ti nagsasaruno a danog ni Kim.
Ni Kim ket isu ti nangsukat ken ni Sam Goodman a simmanod iti laban iti maikadua a gundaway sumagmamano a lawas sakbay ti laban.
Immuna a naikeddeng ti laban idi Disiembre 24 ni Inoue kontra ken ni Goodman ngem simmanod daytoy agingga iti 11 nga aldaw sakbay ti laban ket simmanod manen isu nga insukatda ni Kim.
Nakita ni Inoue a saan a pangta kenkuana ni Kim isu a nagsentro ti danogna iti bagina.
Iti maudi a segundo ti round 3 ket nariknan ni Kim dagiti danog ni Inoue iti buksit nga isu ti nangitunda iti pannakatulidna iti panagserrek pay laeng iti maikapat a round.
Inbatad ti promoter-na a ni Bob Arum a lumaban ni Inoue idiay Las Vegas ken idiay Saudi Arabia kadagiti sumarsaruno a bulan.
Naammoan a dagiti sumagmamano a nakalinya a makalabanna ket isuda Alan Picasso ken Murodjon Akhmadaliev ti number 1 contenders ti WBC ken WBA.
Addaan ti 29 a panangabak, awan pay abakna ken 26 a knockouts ni Inoue idinto a ni Kim ket addaan ti 21 a panangabak, uppat a pannakaabak, dua a draw ken 13 a knockouts.
