LAOAG CITY – Nagtaripnong da dati nga Ilocos Sur Governor Chavit Singson ken Hollywood action star Jean-Claude Van Damme para iti panangaramid ti maysa a pelikula.
Inbatad ni Singson, aramiden ti pelikula ditoy Pilipinas a maitampok ti Vigan City, maysa nga United Nations Educational, Scientific, and Cultural Organization (UNESCO) World Heritage City.
Mismo a ni Van Damme ti agserbi kas producer ti aramiden a pelikula ken manamnama a makita ditoy dagiti sumagmamano nga action stunt a naam-ammo ti action star.
Iti agdama, awan pay ti nairuar no ania ti aramiden a pelikula kabayatan a bukbuklen pay laeng dagiti agbalin a cast daytoy.
Kabayatanna, iti panagsarita da Singson ken Van Damme idiay Central Hong Kong, tinalantan ti dua ti agbalin a kolaborasion iti aramiden a pelikula.
Nabigbig ni Van Damme iti intero a lubong gapu iti napipintas nga action film daytoy kas ti ”Universal Soldier,” ”The Quest,” ”Double Impact,” ”Hard Target” ken dadduma pay a pelikula a kaaduan ket sumensentro iti martial arts skills-na.
