LAOAG CITY – Inpeksa ni Mr. Mark Anthony Gaviola, maysa a jeepney driver iti ruta Laoag-Burgos ti sakit nakemna kadagiti modernized jeepney nga addaan ti ruta a Pasuquin-Laoag nga agiluglugan ti pasahero iti paset ti Sitio Nagabungan, Brgy. Davila iti ili ti Pasuquin.
Segun kenkuana, daytoy ket kalpasan nga awan ti karbengan dagiti maseknan a modernized jeepney drivers nga agilugan kadagiti pasahero iti nasao nasao a lugar.
Inbatadna a masapol laeng nga agpatingga iti sentro iti ili ti Pasuquin ti mabalinda nga ilugan ngem banag a saan daytoy a masursurot.
Gapu iti daytoy, kunana a masapol nga adda ti nasayaat a panagsasaritada maipapan iti daytoy a banag tapno maliklikan ti panagiinnagaw kadagiti pasahero.
Mainaig iti daytoy, inpakaammona nga adda ti naisayangkat a panagtataripnongda no sadino ditoy a naibaga kadakuada a saan a mabalin nga agilugan dagiti modernized jeepney iti Sitio Nagabungan, Brgy. Davila iti ili ti Pasuquin.
Nupay kasta, inpalgakna nga umaboten iti makabulan ngem saan latta a sumursurot dagiti maseknan iti kalikagumda rason a kayatna daytoy a masolbar iti kabiitan a panawen.
Kabayatanna, inlawlawag dagiti operators ti modernized jeepney nga adda ti special permit-da sipod naipatungpal ti “Libreng Sakay” idi kangitingitan ti pandemiya.
Basar kadakuada ket dimmalanda ti umiso a proseso isu nga agtultuloyda latta nga agilugan kadagiti pasahero.
Naammoan nga adda ti tallo a modernized jeepney ti nakaala ti special permit tapno makailugan dagitoy ti pasahero iti Sitio Nagabungan.
