LAOAG CITY – Madlaw ti nakaro a pannakaupay dagiti jeepney drivers iti rota a Laoag-Gabu ti pannakaibabawi ti P1 a fare increase.
Iti eksklusibo nga interview ti Bombo Radyo Laoag ken ni Mr. Jonathan Salvador, Vice President ti Laoag-Gabu Central Terminal, inbatad na nga awan ti maaramidan da gapu ta mismo a ni Presidente Ferdinand Marcos Jr. ti nangibilin ti pannakaibabawi ti pannakaipangato ti plete kadagiti pampubliko a transportasyon.
Inlawlawag ni Salvador a gapu iti panagngato ti presyo dagiti produkto a petrolyo ket arigna awanen ti mapastrek da aglalo kadagiti makipaspasada laeng.
Innayon na a ti agtultuloy a panagpasada da ket maysa a sakripisyo para kadakuada ti agserbi iti publiko aglalo kadagiti commuters.
Kuna pay ni Salvador a no awan ti mapidot da a pasahero iti panagpasentro da ket awanen ti mapastrek da.
Gapu iti daytoy, nagpanawagan ni Salvador iti lokal a gobierno ditoy ciudad ti Laoag, aglalo ken ni Mayor James Bryan Alcid a makita koma a nasayaat ti pannakaipatungpal dagiti naputar a prangkisa dagiti tricycle ditoy ciudad kangrunaan na dagiti barangay franchise.
Inpetteng ni Salvador a nakalawlawag iti pagannurutan a saan a mabalin ti agpidot ti pasahero dagiti tricyle iti national highway gapu ta maagawan da nga agpaspasada iti jeep.
Inpalgak ni Salvador a nakabaybayag dan nga agtepteppel gapu ta saan met a matungtungpal ti napanday a pagannurutan iti konseho ditoy ciudad ti Laoag.
