LAOAG CITY – Nagballigi iti comeback fight ni Jerwin Ancajas kalpasan a nadiskualipikar ti kalaban daytoy a ni Sukpraserd Ponpitak ti Thailand.
Inpasardeng ti referee iti maikalima a round iti uneg ti 2:34 idi induron ni Pontipak ni Ancajas iti laban a naisayangkat idiay siudad ti Mandaluyong.
Iti umuna a round pay laeng ket binallaaganen ti referee ti Thai boxer ngem saanna nga ingkankano isu a pinasardengna ti laban.
Nakissayan ti puntos ti agtawen iti 36 a ni Pontipak ken daytoyen ti maika-20 a pannakaabak iti karerana.
Naammoan a sipod idi rugrugina ket nagbalin nga agresibo ni Ancajas no sadinno pinabagsakna ti beterano a ni Pontipak.
Adda ti 35 a panangabak, uppat a pannakaabak ken dua a draw nga addaan ti 23 knockouts ni Ancajas.
Kabayatanna, daytoy ti umuna a balligina kalpasan ti pito a bulan idi abaken isuna ni Takuma Inoue iti Japan.
