LAOAG CITY – Inadmitir ti aktres a ni Jessy Mendiola a dandani nakisina iti asawa na a ni Luis Manzano idi nabiit da pay a nagkasar.
Inlawlawag ni Jessy a kakas-kasar da paylaeng idi naaddaan da ti nakaro a panagriri gapu kadagiti papagayam ni Luis a saan a nagustuwan ti aktres.
Inbatad ni Jessy a narikna na nga adda ti sabali nga intensyon dagiti saannan nga innaganan a papagayam ni Luis isut gapuna nga inyuman na daytoy a banag iti asawa na.
Nupay kasta, imbes a kanunungan ni Luis ni Jessy ket nagpannuray kenkuana ti nabayagen a panagkakadwa da kadagiti papagayam na ken nakapungtot iti asawa na a nagresulta ti nakaro a panagriri da.
Gapu iti daytoy, napanunot ti aktres a saan pay a nakasagana ni Luis a mangbukel ti bukod na a pamilya gapu ta saanna a kabaelan a pilyen, iprayoridad ken ikalintegan daytoy.
Mainaig iti daytoy, inyuman ni Jessy iti katugangan na a ni Vilma Santos ti plano nan a pannakisina ken ni Luis gapu ta mariribukan unayen kangrunaan na ket saanen a panpansinen ti asawa na kalpasan a nagriri da.
Binalakadan met ni Vilma nga agpanunot a nasayaat ti aktres sakbay nga agaramid ti pinal a desisyon.
Kalpasan laeng ti sumagmamano nga aldaw sipud nagpakadan ni Jessy ken ni Vilma ket nariing metlaeng ni Luis iti kinapudno isut gapuna a pinili ti aktres ti agtalinaed iti denna ti asawa na gapu iti panagayat na kenkuana.
Iti agdama ket addan tallo a tawen sipud nagkasar da Jessy ken ni Luis, ken addaan dan ti maysa nga anak a ni Rosie, agtawen ti maysa.
Maipalagip nga idi 2023 ket nairaman ti nagan ni Luis kadagiti reklamo ti sumagmamano nga investors kontra iti Flex Fuel Petroleum Corporation, nga imanmanigit ti “childhood friend” ti TV host-actor.
Nupay kasta, iti imbestigasyon ti National Bureau of Investigation (NBI), napaneknekan nga awan ti pakainaigan ken ammo ni Luis iti syndicated estafa case a naipila kontra iti Flex Fuel.
