LAOAG CITY – Naragsak nga inburay ti dancer ken TV-host a ni Jhong Hilario ti maaddaan ti nangato a merits iti panagturposna ti Masters Degree in Public Administration iti World Citi College.
Kinadua isuna ti asawana, ina ken anakna a nagmartsada tapno awaten ti diploma daytoy iti alma mater-na iti graduation a naiyuswat iti PICC Plenary Hall.
Inbatadna a dimmanon iti maysa a tawen daytoy a nagadal babaen iti modular program.
Maipatulod kadakuada dagiti modules ken isuda ti agbirok kadagiti libro para iti research.
Saan daytoy a mamati a maileppasna ti kursona gapu ta makumikom kas maysa nga artista ken konsehal iti siudad ti Makati.
Kunana nga agingga nga adda ti oportunidad a makaadal ket gundawayanna nangruna ket saan a tungpal-biag ket artista isuna.
Inlawlawagna nga awan ti planona nga agpaidasig iti nangatngato a posision inton eleksion.
