LAOAG CITY – Agserbi kas team captain ti Alas Pilipinas ti multi-awarded setter a ni Jia De Guzman para iti masungad a laban ti national team iti Asian Women’s Volleyball Challenge Cup wenno AVC Challenge Cup.
Kas host ti Pilipinas, daytoy ket maiyuswat inton Mayo 22, 2024 agingga Mayo 29, 2024 iti Rizal Memorial Coliseum idiay Manila.
Ni De Guzman ket 8-time Best Setter ti Premier Volleyball League no sadino karaman isuna ti Creamline Cool Smashers.
Idi 2023, saan a nagay-ayam ni De Guzman iti PVL 2nd All Filipino Conference kalpasan a nagbalin nga import ti Japan club team a Denso Airybees. Isuna ti kaunaan a Filipina setter ti maikalima a Filipino a nakaay-ayam iti Japan V. League.
Kadua ni Jia De Guzman iti national team ti sumagmamano a players iti pro ken collegiate leagues kas da Sisi Rondina ti Choco Mucho Flying Titans, Eya Laure ken Jennifer Nirva ti Chery Tiggo ken Thea Gagate ken Julia Coronel ti La Salle.
Karaman ti Pilipinas iti Pool A isu a makalabanna iti round-robin preliminaries ti volleyball team ti Chinese Taipei, India, Iran ken Australia.
Ti mangabak a pagilian ket lumaban met iti FIVB Women’s Challenger Cup inton Hulio.
